اسلام آباد (ویب ڈیسک، وی او این نیوز) وزیراعظم شہباز شریف نے سعودی عرب کی خودمختاری، سلامتی اور علاقائی سالمیت کے تحفظ کے لیے پاکستان کے عزم کا اعادہ کرتے ہوئے کہا ہے کہ اسٹریٹجک باہمی دفاعی معاہدہ اور مکہ مشترکہ دفاعی اتحاد پاکستان اور سعودی عرب کے دیرینہ برادرانہ تعلقات میں تاریخی سنگِ میل کی حیثیت رکھتے ہیں۔ دونوں ممالک علاقائی امن و سلامتی کے لیے مشترکہ عزم رکھتے ہیں اور پاکستان سعودی عرب کے ساتھ کھڑا رہے گا۔
وزیراعظم آفس کے میڈیا ونگ سے جاری بیان کے مطابق وزیراعظم شہباز شریف سے سعودی عرب کے نو تعینات سفیر ڈاکٹر راجح طامی البقمی نے ملاقات کی۔ وزیراعظم نے پاکستان آمد پر سعودی سفیر کا خیرمقدم کیا، انہیں نئی ذمہ داریاں سنبھالنے پر مبارک باد دی اور سفارتی فرائض کی انجام دہی میں کامیابی کے لیے نیک خواہشات کا اظہار کیا۔
ملاقات کے دوران دوطرفہ تعلقات، علاقائی سلامتی اور مختلف شعبوں میں تعاون کو مزید فروغ دینے کے امور پر تبادلۂ خیال کیا گیا۔ وزیراعظم نے کہا کہ حالیہ برسوں میں پاکستان اور سعودی عرب کے تعلقات میں نمایاں پیش رفت ہوئی ہے۔ پاکستان دونوں ممالک کے درمیان تعاون کو مزید گہرا اور وسیع کرنے کے لیے موجودہ ادارہ جاتی نظام کو مضبوط بنانے کے لیے پُرعزم ہے۔
سعودی عرب پر حملوں کی مذمت، یکجہتی کا اظہار
شہباز شریف نے سعودی عرب کے خلاف حوثی حملوں میں حالیہ اضافے کی شدید مذمت کرتے ہوئے کہا کہ ان حملوں کے نتیجے میں قیمتی جانوں کا نقصان ہوا اور پاکستانی شہریوں سمیت متعدد بے گناہ افراد زخمی ہوئے۔
وزیراعظم نے کہا کہ پاکستان اور سعودی عرب ہمیشہ ایک دوسرے کے شانہ بشانہ کھڑے رہے ہیں۔ ان کے مطابق اسٹریٹجک باہمی دفاعی معاہدہ اور مکہ مشترکہ دفاعی اتحاد دونوں ممالک کے دیرینہ تعلقات کو مزید مستحکم کرنے اور خطے میں امن و سلامتی کے مشترکہ مقاصد کے حصول میں اہمیت رکھتے ہیں۔
انہوں نے سعودی عرب کی قیادت کی جانب سے پاکستان کو فراہم کی جانے والی طویل مدتی اقتصادی اور مالی معاونت پر شکریہ ادا کیا اور سعودی سفیر کو یقین دلایا کہ پاکستان دونوں ممالک کے برادرانہ تعلقات کو مزید مستحکم کرنے کے لیے مکمل حمایت اور تعاون فراہم کرے گا۔
استنبول میں سیلاب پر اظہارِ افسوس
دوسری جانب وزیراعظم شہباز شریف نے ترکیہ کے شہر استنبول میں شدید سیلاب کے باعث جانی نقصان اور تباہی پر گہرے دکھ اور افسوس کا اظہار کیا ہے۔
سماجی رابطے کی ویب سائٹ ایکس پر اپنے پیغام میں وزیراعظم نے ترک صدر رجب طیب ایردوان اور متاثرہ خاندانوں سے دلی تعزیت کی۔ انہوں نے زخمیوں کی جلد صحت یابی اور لاپتہ افراد کی بحفاظت بازیابی کے لیے دعا بھی کی۔
شہباز شریف نے کہا کہ پاکستان اپنے برادر ملک ترکیہ کے عوام کے ساتھ مکمل یکجہتی کا اظہار کرتا ہے اور اس مشکل وقت میں ہر ممکن مدد فراہم کرنے کے لیے تیار ہے۔
سید بابر علی سے اہلیہ کے انتقال پر تعزیت
وزیراعظم شہباز شریف سید بابر علی کی رہائش گاہ پر بھی گئے، جہاں انہوں نے ان کی اہلیہ کے انتقال پر افسوس کا اظہار کیا اور سوگوار خاندان سے تعزیت کی۔
غربت کا خاتمہ مشترکہ قومی ذمہ داری ہے، وزیراعظم
وزیراعظم شہباز شریف نے غربت کے خاتمے کے عالمی دن کے موقع پر اپنے پیغام میں قومی اور عالمی سطح پر غربت کے خاتمے، عدم مساوات میں کمی اور ترقی کے مساوی مواقع کی فراہمی کے لیے مشترکہ، مؤثر اور عملی اقدامات کی ضرورت پر زور دیا۔
وزیراعظم آفس کے جاری کردہ بیان کے مطابق شہباز شریف نے کہا کہ حکومت عوام کی معاشی و سماجی ترقی کے لیے مربوط حکمتِ عملی پر عمل پیرا ہے۔ نوجوانوں کے لیے باعزت روزگار، کاروبار اور معاشی مواقع پیدا کرنا غربت کے خاتمے کی بنیادی ضمانتوں میں شامل ہے۔
انہوں نے کہا کہ غربت کا خاتمہ پوری قوم کی مشترکہ ذمہ داری ہے۔ وفاقی اور صوبائی حکومتوں، ترقیاتی شراکت داروں، سول سوسائٹی، نجی شعبے اور مقامی آبادیوں کی مشترکہ کوششوں سے ہی ایک ایسا پاکستان تشکیل دیا جا سکتا ہے جہاں شہری معاشی و سماجی تحفظ کے ساتھ خودانحصاری اور خوشحالی کی جانب بڑھ سکیں۔
وزیراعظم نے کہا کہ ہر شہری کے سماجی و معاشی حقوق کا تحفظ، عزت و وقار کی پاسداری اور معاشی ترقی کے مساوی مواقع فراہم کرنا بنیادی انسانی حقوق کا حصہ ہے۔ غربت میں کمی سے معاشرتی تقسیم اور دیگر سماجی مسائل پر قابو پانے میں بھی مدد مل سکتی ہے۔
وزیراعظم اپنا گھر سکیم کے تحت آسان قرضے
شہباز شریف نے کہا کہ مالی خوشحالی، خوراک کی دستیابی اور محفوظ رہائش غربت کے خاتمے کے اہم پہلو ہیں۔ محفوظ اور باوقار رہائش شہریوں کی فلاح و بہبود کے لیے بنیادی اہمیت رکھتی ہے۔
انہوں نے بتایا کہ حکومت وزیراعظم اپنا گھر سکیم کے تحت شہریوں، بالخصوص مالی لحاظ سے کمزور طبقات، کو باعزت رہائش کے حصول کے لیے آسان قرضوں کی فراہمی اور قابلِ استطاعت گھروں کی تعمیر و خریداری کے لیے مالی معاونت تک رسائی بڑھانے کے اقدامات کر رہی ہے۔
وزیراعظم کے مطابق موسمیاتی تبدیلی، سیلاب اور شدید بارشیں بھی رہائش کے مسائل میں اضافے کا سبب بنتی ہیں، اس لیے کمزور طبقات کو محفوظ رہائش فراہم کرنے کے لیے مؤثر اقدامات ضروری ہیں۔
سماجی تحفظ اور روزگار کے مواقع بڑھانے پر زور
وزیراعظم نے کہا کہ عوام کی سماجی و معاشی بہبود حکومت کی آئینی ذمہ داری ہے اور آئینِ پاکستان ایک فلاحی ریاست کے قیام کے قومی عزم کی عکاسی کرتا ہے۔ اسی مقصد کے تحت سماجی تحفظ کو انسانی ترقی، ہنرمندی کے فروغ، روزگار اور معاشی خودمختاری سے منسلک کیا گیا ہے۔
انہوں نے کہا کہ مستحق افراد کو براہِ راست مالی معاونت فراہم کرنے کے لیے بینظیر انکم سپورٹ پروگرام جاری ہے۔ امداد کی منصفانہ تقسیم اور شفافیت کو یقینی بنانے کے لیے قومی سماجی و معاشی رجسٹری اور ڈیجیٹل سماجی تحفظ والٹ جیسے اقدامات بھی کیے گئے ہیں۔
شہباز شریف نے مزید کہا کہ تعلیم کے مساوی مواقع، فنی و پیشہ ورانہ تربیت اور مستقل ذرائع معاش کی فراہمی غربت میں کمی کے لیے ناگزیر ہے۔
انہوں نے عوام، حکومت اور تمام متعلقہ اداروں پر زور دیا کہ ایک خوشحال اور روشن مستقبل کے حامل پاکستان کی تعمیر کے لیے اجتماعی عزم کو مضبوط بنایا جائے تاکہ کوئی فرد یا طبقہ ترقی کے ثمرات سے محروم نہ رہے۔
